جۆرێن (ئەوێ دی) د کورتە چیرۆکا( پێلاڤا تەمۆ)ی ل دویڤ بنە مایێن تیۆرا دەروونشیکارییا (جاک لاکان)ی

(ئەوێ دی) ، مژارەکە شوپێن ئامادەییا خوە دگشت بیاڤێن ژیانا مرۆڤیدا چەسپاندینە. ژئەڤێ روانگێ ،وەک تەوەرەکێ سەرەکی د مەیدانا دانو ستاندنێن فەلسەفیدا، دەربازی ڤەکۆلینێن زانستێ (کۆمەلناس، سیاسی،دەروونناسی….هتد) بوویە. کورتە چیرۆکا(پێلاڤا تەموی)ی یا( عسمەت محەمەد بەدەل)؛ نموونەکا هه لبژارتییە بۆ دەستنیشانکرنا پێگەهـ و رۆلێ (ئەوێ دی) د پێکهاتا تێکستێ ئەدەبیدا. ئەڤە ژی ژ گۆشەنیگا خواندنا رەخنا دەروونشیکاری ل سەر بنەمایێن تیۆرا دەروونشیکارییا دەروونشیکارێ فرەنسی (جاك لاکان 1981_1901_Jacques Lacan )ی هاتییە ئەنجامدان .ئەڤ تیۆرە قوناغێن وەرارا دەروونییا مرۆڤی پێکهاتا (ئەز)و(خود) ی و پەیدا بوونا هه ڤرکییا دناڤبەرا ئەواندا دمیانەیا دوو جۆرێن (ئەوێ دی) دا شرۆ ڤە دکەت .ئەو ژی؛ (ئەوێ دیێ بچوویك) کو چ هەبوونێن راستەقینە و بەرجەستە نینن، تەنها ب رێکا خەیاڵی باندۆرا خوە دگێریت؛ چونکی ل قوناغا ئاوێنە د سیستەمێ خەیالیدا ل سەر بنەمایێ کاملانییا وێنێ رەنگڤەدایی دئاوێنەیێدا پەیدا دبیت و بەشداری ئاڤابوونا(ئەز)ی دبیت جۆرێ دووێ ژی (ئەوێ دیێ مەزن)، ئەوێ دسیستەمێ هێماییدا؛ تێگەهێ یاسا و سیستەمێن رێکخستنا پەیوەندیێن جڤاکی دناڤا خوەد هه لدگریت و باندۆرا ئەوان ل سەر نەستا خودی ب رێکا زمانی خویا دبن . ئەڤ چەندە ب نموونەڤە ل کورتە چیرۆکا هه لبژارتی د میانەیا ئاخڤتنا-گوتارا بێژەییا (تەمو) ی وەك کەسایەتییا سەرەکی هاتینە شرۆڤەکرن.